Terakt ijrochiligida gumonlanib surati tarqatilgan markaziy osiyolik teraktga aloqador emasligini ma'lum qildi

1 yanvarga o‘tar kechasi Istanbuldagi Reina nomli tungi klubga uyushtirilgan hujum ijrochisiligida gumon qilinib, fotosurati ijtimoiy tarmoqlarda tarqatilgan, kelib chiqishiga ko‘ra markaziy osiyolik bo‘lgan shaxs o‘zining aybsizligini ma'lum qildi.

Politsiya terakt IShID a'zosi bo‘lgan O‘zbekiston yoki Qirg‘iziston fuqarosi bo‘lishi mumkinligi haqida xabar tarqatgandi.

Haberturk ma'lumotiga ko‘ra, surati tarqatilgan shaxs Qozog‘iston fuqarosi bo‘lib, u Turkiyada oyoq kiyim savdosi bilan shug‘ullanuvchi tadbirkordir. U o‘zining terrorchi sifatida gumon qilinayotgani haqidagi xabarlardan keyin Istanbulning Zaytunburni tuman ichki ishlar idorasiga borib, teraktga aloqador emasligini ma'lum qilgan. Shuningdek, u o‘zi haqida yolg‘on xabar tarqatib, nomini bulg‘agan saytlar ustidan shikoyat arizasini topshirgan.