Toshkentda “Navro‘z” bog‘i quriladi

O‘zbekiston Prezidenti Shavkat Mirziyoyev “Toshkent shahrida “Navro‘z” bog‘ini qurish” loyihasini amalga oshirish bo‘yicha chora-tadbirlar to‘g‘risida”gi qarorni imzoladi.

Qarorda aytilishicha, “Navro‘z” bog‘ini barpo etish bo‘yicha loyiha 2017-2019 yillarda amalga oshiriladi. “Navro‘z bog‘i” MChJ ushbu loyihani amalga oshirmoqda.

Jamiyatning ustav fondi “O‘zbekiston temir yo‘llari” AJ va O‘zbekiston Respublikasi Tashqi iqtisodiy faoliyat Milliy banki tomonidan shakllantiriladi.

Qarorga ko‘ra, “Turon bank” ATB “O‘zbekiston temir yo‘llari” AJga loyihani amalga oshirish uchun 10 mln. dollar miqdorida kredit taqdim etadi. Kredit 10 yillik muddatga, O‘zbekiston Markaziy bankining qayta moliyalashtirish stavkasi bo‘yicha beriladi.

O‘zbekiston Prezidenti bog‘ni qurish bo‘yicha loyiha ishtirokchilariga qator soliq imtiyozlarini taqdim etdi.