Malakali o‘qituvchilar borib ishlasa, 100 foiz ustama to‘lanadigan maktablar ro‘yxati tasdiqlandi 

Ro‘yxat viloyatlar va tumanlar kesimida alohida shakllantirilgan.

Ta’lim darajasi yuqori bo‘lmagan maktablarda dars berish uchun boshqa hududlardan jalb qilingan oliy va birinchi toifaga ega o‘qituvchi-pedagoglarning bazaviy tarif stavkalariga 100 foiz (bir ma’muriy birlik doirasida 50 foiz) maxsus ustamalar belgilanadi.

 Joriy o‘quv yilida 1409 ta ta’lim darajasi yuqori bo‘lmagan maktablarga 500 nafarga yaqin pedagog jalb etilgan, deb ma’lum qildi Xalq ta’limi vazirligi.

2022-2023 o‘quv yilida ta’lim darajasi yuqori bo‘lmagan maktablarga boshqa hududlardan pedagoglar borib ishlashlari uchun joriy yilning 15 may kunidan boshlab elektron platforma – Ustozfondi.uz orqali ro‘yxatdan o‘tishlari talab etiladi.