Самарқандлик бўлажак агрономлар ва механизаторлар аросатда: уларга ваъда қилинган университет филиали ҳамон очилмади

Kun.uz таҳририятига Самарқанд ветеринария медицинаси институтининг барча тугатилаётган факультетлари 3–4 босқич талабалари томонидан мурожаат келиб тушди.

Мурожаат мазмунига кўра, Самарқанд ветеринария медицинаси институтининг барча тугатилаётган факультетларининг 3–4-босқич талабалари аросатда қолишган. Улар қишлоқ хўжалиги институтига ҳужжат топшириб, ветеринария медицина олийгоҳини тамомлашга мажбур бўлишмоқда. Бир қатор йўналишларда ўқиган талабалар янги институт дипломи билан ишга жойлашиш қийинлигини айтишмоқда.

«Биз 2016-2017 йил собиқ Самарқанд қишлоқ хўжалиги институтининг «Агроинжинерия», «Агрономия», «Менежмент» факултетларига ўқишга қабул қилинган эдик.

2017 йили биз ўқиб турган институт негизида Самарқанд ветеринария медицинаси институти ташкил этилди, яъни номи ўзгарди. Янги институт ташкил этилиши билан, биз ўқиётган факультетлар тугатилишга юз тутди ва бу таълим йўналишларига талабалар қабул қилинмай қўйди.

Шундан кейин Ўзбекистон Республикаси президентининг 2019 йил 19 августдаги ПҚ–4421-сонли «Тошкент давлат аграр университети фаолиятини янада такомиллаштириш чора-тадбирлари тўғрисида»ги қарор қабул қилинганини эшитиб, қарор билан танишиб чиқдик.

Қарорда Тошент давлат аграр университети Самарқанд филиали фаолиятини ташкил этиш тўғрисида қайд этиб ўтилган, шу билан бирга, «2 ой ичида тегишли мутасадди ташкилотлар Вазирлар Маҳкамасига таклиф киритсин», деб белгилаб қўйилган.

Биз бундан жуда ҳам хурсанд бўлдик ва тез фурсат ичида Вазирлар Маҳкамасининг ID 7075 сонли қарори лойиҳаси regulation.gov.uz муҳокамалар порталида кенг оммага эълон қилинди.

Ушбу қарор лойиҳасининг 7-банди ва 4-иловасида шундай дейилган: 2019-2020 ўқув йилидан СамВМИнинг бакалавриат таълим йўналишларида таҳсил олаётган 3–4 босқич талабалар контингенти ҳамда мос равишда профессор-ўқитувчилари таркибини филиалга ўтказиш бўйича маълумот илова қилинган.

Яъни, бизнинг мутахассислигимиз, таълим олаётган йўналишларимиз қайд этилган. Албатта, биз бу қарор лойиҳасини тўлиқ қўллаб-қувватлаймиз.

Ҳақиқатан ҳам, биз Самарқанд қишлоқ хўжалиги институтига ўқишга қабул қилиниб, Самарқанд ветеринария медицинаси институтини битиришимиз туфайли иш фаолиятимизни бошлашга тўсиқликларга учрашимиз мумкин. Ахир биз қишлоқ хўжалиги ходимлари агрономлар ва қишлоқ хўжалиги механизаторларимиз. Биз ўз ўрнимиз, ўз жойимизни топишимиз зарур.

Шу пайтгача Самарқанддаги MAN-Auto заводида талабаларимиз ишлаб чиқариш амалиётида мунтазам қатнашиб келишган. Ўқув даргоҳимиз Ветеринария медицинаси институтига айлангач, бундай муҳим амалиётдан ҳам воз кечилди. Қўпол қилиб айтганда, мол дўхтирига машина заводида нима бор?

«Менежмент» йўналишини битирган талабаларимиз эса турли банкларга, хусусан «Агробанк»да ишга жойлашар эди. Энди бу янги институт дипломи билан уларнинг ишга жойлашишида ҳам муаммолар кўзга ташланмоқда.

Хуллас, ушбу қарор лойиҳаси қабул қилинишини ва бизнинг тақдиримизга барча мутасадди ташкилот ва вазирликлар бефарқ бўлмасликларини сўраймиз. Биз барча талабалар ушбу арзномамизни масъул мутасадди раҳбарлар кўриб чиқишини хоҳлаймиз.

Ҳукумат қарори лойиҳасини қабул қилиш кечикаётганидан хавотирдалигимизни билдирамиз ва тез фурсатларда қабул қилинишида амалий ёрдам беришингизни сўраймиз», — дейилган мурожаатномада.