Тайванда қуролли ҳужум уюштирган шахс ўндан ортиқ одамни пичоқлади

Жиноятчи 19 декабр, маҳаллий вақт билан соат 17:20 лар атрофида аввалига метронинг йўловчилар гавжум бекатларидан бирига тутунли гранаталар ва Молотов коктейлларини улоқтирган. Кейин метронинг 800 метр наридаги бошқа бир бекатига қараб югуриб, йўлида бир неча кишини пичоқлаб кетган. Иккинчи бекатга боргач, у ерга ҳам гранаталар ташлаган ва одамларга пичоқ билан ҳужум қилган.

27 ёшли эркак ҳужумдан кейин яқин атрофдаги бино томидан сакраб, касалхонага олиб борилганида вафот этган. Шу билан ҳалок бўлганлар сони 4 нафарни ташкил этмоқда.

Қурбонлардан бири – қотилни тўхтатишга уринган эркак экани айтиляпти, у кейинчалик шифохонада жон берган.

Гумондор – Чанг Вен исмли Тайван фуқароси. Мамлакат бош вазири Чо Жунг ҳужумни “қасддан қилинган ҳаракат” деб атаган. Терговнинг дастлабки версиясига кўра, у ёлғиз ўзи ҳаракат қилган.

Ҳодисадан кейин мамлакат бўйлаб темирйўл ва метро бекатларида хавфсизлик чоралари кучайтирилган.

Қайд этиш лозим, Тайванда зўравонлик жиноятлари суръати анча паст, бундай ҳолатлар ушбу мамлакатда камдан кам кузатилади. Шунга ўхшаш охирги воқеа 2014 йилда бўлган, ўшанда бир эркак Тайпей метросида тўрт кишини ўлдирган, орадан икки йил ўтиб у қатл этилган.