Блогер Отабек Сатторий иши бўйича суд бўлиб ўтмоқда, жабрланувчи аризани ўз ихтиёри билан берганини билдирди

Бугун, 11 март куни бўлиб ўтаётган суд жараёнида жабрланувчилар тингланди. Шеробод туманида жойлашган «Чинора Гул барака» деҳқон бозори раҳбари Лочин Т. суд жараёнида Отабек Сатторийга қарши ариза беришга ҳеч ким ундамаганни, ўз ихтиёри билан шундай йўл тутганини билдирди. 

Жабрланувчи тасвирга олишда айнан нимадан қўрққани, товламачилик содир бўлишга ундовчи айнан қайси камчилик яширилгани бўйича саволга аниқ жавоб бермади. Шунингдек, Сатторий айнан нимани тасвирга олганини билмаганини, лекин шунга қарамай бузилган телефон ўрнига янги телефон олишни талаб қилгани қай даражада қонунга мослигини бўйича ҳуқуқни муҳофаза қилувчи органларга мурожаат қилишга мажбур бўлганини ва буни тасдиқловчи далилларга эга эканлигини билдирди.

Суд жараёни давом этмоқда. 

Аввалроқ, Отабек Сатторий иши бўйича тергов якунлангани, блогер Жиноят кодексининг 3та моддаси билан айбланаётгани хабар қилинганди. 

Тергов департаментининг маълум қилишича, жиноят ишини тергов қилиш жараёнида Отабек Сатторий саккиз нафар фуқаронинг сир сақланиши лозим бўлган маълумотларини ошкор қилиш билан қўрқитишда, бу орқали моддий манфаат кўриб келганликда, фуқароларга Telegram, Facebook, YouTube орқали туҳмат қилиш, ҳақорат қилиш каби жиноятларни содир қилганликда айбланган.