“Рецептсиз бериладиган муҳим дорилар рўйхати шакллантирилган” – ССВ “Электрон рецепт” бўйича тушунтириш берди

Ижтимоий тармоқларда “Электрон рецепт” тизими жорий этилгани ортидан шифохоналарда тартибсизлик юзага келгани, шифокорлар эса рецепт ёзолмаётгани ҳақида хабарлар тарқалди. Соғлиқни сақлаш вазирлиги ҳолат юзасидан расмий баёнот берди.

Вазирликка кўра, “Электрон рецепт” тизимини жорий этишдан кўзланган асосий мақсад — даволаш хавфсизлигини ошириш ва беморлар саломатлигини ҳимоя қилиш, шифокорларнинг дори тайинлашдаги масъулиятини кучайтириш, дори воситаларини тайинлаш жараёнини тартибга солиш, соғлиқни сақлаш тизимида рақамли ҳисобга ўтиш, шунингдек, контрафакт ёки нотўғри қўлланаётган дори воситалари айланмаси билан боғлиқ хавфларни камайтиришдан иборат.

“Электрон рецепт” тизими ҳозирда Тошкент шаҳри ва норматив ҳужжатлар билан белгиланган 15 та туманда жорий этилмоқда. Тизимни бутун республика бўйлаб кенгайтириш 2026 йил охиригача босқичма-босқич амалга оширилиши режалаштирилган. Бу натижаларни таҳлил қилиш, аниқланган ташкилий ва техник муаммоларни инобатга олган ҳолда амалга оширилади.

“Соғлиқни сақлаш вазирлиги фуқароларнинг хавотирини тўлиқ тушунади ва таъкидлайдики: фавқулодда ҳолатларда, шунингдек, болаларга, кекса ёшдаги шахсларга ва сурункали касалликка чалинган беморларга тиббий ёрдам кўрсатишда ҳеч ким зарур дори воситаларисиз қолмайди. Ушбу тоифадаги беморлар алоҳида назоратда бўлади”, дейилади вазирлик баёнотида.

Қайд этилишича, янги тизимни жорий қилиш даври мобайнида Соғлиқни сақлаш вазирлигида вазир раҳбарлигида доимий фаолият юритувчи ишчи гуруҳ ташкил этилган. Ушбу гуруҳ таркибига шифокорлар, дорихона ташкилотлари ва АКТ мутахассислари киритилган. Ишчи гуруҳ тизимнинг амалда қўлланишини мунтазам мониторинг қилади, фуқаролар ва тиббиёт ходимларининг мурожаатларини кўриб чиқади, поликлиникаларга тушаётган юкламани, рақамли сервислар барқарорлигини ва дори воситаларини бериш тартибини таҳлил қилади. Зарур ҳолларда тезкор тарзда тегишли тузатишлар киритилади.

“Шифокор рецептисиз бериладиган асосий ҳаётий муҳим дори воситаларининг базавий рўйхати шакллантирилган. Унинг мақсади — кундалик ва фавқулодда маиший ҳолатларда аҳолига тезкор тиббий ёрдам олиш имкониятини таъминлашдир. Рўйхат халқаро амалиёт, шифокорлар тавсиялари ва ҳаётий ҳолатлардан келиб чиққан ҳолда ишлаб чиқилган ҳамда Соғлиқни сақлаш вазирлигининг расмий ахборот ресурсларида эълон қилинган. Бу жараёнда у амалий қўлланиш натижалари ва келиб тушаётган таклифлар асосида аниқлаштирилиши ва тўлдирилиши мумкин”, дея маълум қилган вазирлик.

Шунингдек, Тошкент шаҳри ва 15 та тажриба ҳудудларида жойлашган дорихоналарда жорий қилинган “Электрон рецепт” тизими доирасида вужудга келаётган мурожаатларни қабул қилиш учун Telegram’да @ssv_pilotbot ташкил этилган. Ушбу бот орқали тизим ва дори воситаларини бериш билан боғлиқ барча мурожаатлар устувор тартибда кўриб чиқилади.

Маълумот учун, Вазирлар Маҳкамасининг 2025 йил 8 сентябрдаги тегишли қарорига биноан 2025 йил 10 декабрдан бошлаб Тошкент шаҳри ҳамда тажриба-синов лойиҳаси амалга оширилаётган 15 та туман (шаҳар) ҳудудидаги дорихоналар “Электрон рецепт” тизимига ўтган.

Амалдаги қонунчиликка кўра, дорихоналар томонидан рецепт асосида берилиши лозим бўлган дори воситасини рецептсиз берганлик учун жавобгарлик белгиланган. Эндиликда шифокор томонидан тайинланадиган айрим дори воситаларини харид қилишда фуқароларга дорихонага албатта, шифокор томонидан тизимга киритилган электрон рецепт асосида мурожаат этиш тавсия этилмоқда.