“Фарғонада у зўр эканини кўрсатиб қўймоқчи бўлган” – танишини машинада қасддан уриб ўлдирган шахс ишида ҳукм ўқилди

Фарғона шаҳрида Lacetti машинаси билан танишини уриб кетиб, ўлдирган шахс иши судда кўриб чиқилиб, ҳукм ўқилди. Kun.uz суд ҳужжати билан танишди.

Кўчадаги ошкора қотиллик

Ҳукмда келтирилишича, ушбу жиноят 1993 йилда туғилган Ф.З. томонидан содир этилган.

У 2025 йил 10 июл куни марҳум М.А. укаси ҳақида ноўрин гапларни тарқатиб юрганини важ қилиб, уни қасддан ўлдириш режасини тузган. Ф.З. Lacetti машинасини Фарғона шаҳри Ўзбекистон овози кўчаси бўйлаб бошқариб бориб, йўлнинг қарама-қарши томонида тўхтаган. Сўнгра Lixiang L9 машинасида ўтирган М.А. олдига бориб, автомобил эшигини очмоқчи бўлган. Бироқ машина эшиги ичкаридан қулфлангани сабаб очолмаган.

Шундан сўнг Ф.З. ўзи билан олиб келган пичоқ ёрдамида машинанинг ҳайдовчи томон ойнасини синдирган. М.А. унинг тажовузидан ҳимояланиш мақсадида ён ўриндиққа ўтиб, машина эшигини очган ва ундан тушиб қочган. Ф.З. унинг ортидан қувиб етолмаган. Кейин ўз машинасига қайтиб, Lacetti’да М.А. ортидан қувган ва уни қасддан катта тезликда уриб кетган. Оқибатда оғир тан жароҳати олган М.А. вафот этган.

“Қасддан уриб кетмадим”

Ф.З. судда айбига иқрор бўлмаган ва М.А.ни қасддан уриб кетмаганини, аслида улар ўртоқ бўлишганини айтган.

“М.А.ни 2000 йилдан буён танийман. 2009 йили Олимпия захиралари спорт коллежида бирга ўқиганмиз. Аслида, ўртоқ бўлганмиз. Ҳатто ўзимга тегишли хонадонда бирга яшаганмиз. Ҳар хил гаплар сабабли муносабатларимиз бироз бузилиб қолганди. Воқеадан 20 кун аввал кафеда у билан қўл ташлашиб, ўртамиздаги масала ёпилган. Шундан кейин яна кимдир ноўрин гап-cўз тарқатиб, ўртамизни бузишга ҳаракат қилди.

М.А.нинг машинасини йўлда кўриб қолиб, у билан сўрашиб олмоқчи бўлдим. Йўлнинг қарама-қарши томонида тўхтаб, йўлдан ўтдим ва М.А.нинг машинасини очмоқчи бўлдим, лекин ичидан қулфланган экан. М.А. машина ичида ўтириб, сўкиниб юборди. Шунда жаҳлим чиқиб, машина ойнасини бир неча маротаба қўлим билан урдим. Оқибатда қўли синди. М.А. машинанинг нариги эшигидан тушиб, қочиб кетди. Уни бироз қувладим, аммо етолмадим.

Сўнг машинамга келдим ва орқага қайрилиб, кетмоқчи бўлдим. Бир машина йўлимни қисди. Шунда биринчи даражали йўлдан иккинчи даражали йўлга ўтишга мажбур бўлдим. Қонаган қўлимга қараган пайтимда кимнидир уриб юбордим. Дарҳол тўхтадим. Кейин М.А.ни уриб юборганимни билдим. У ердан ўша ерда бўлган таниш йигитлар кетказиб юборишди. М.А.да қасдим ва уни ўлдириш мақсадим бўлмаган”, деган Ф.З. суддаги кўрсатмасида.

Шунингдек, у бу ишда айби йўқлигини, аслида йўл-транспорт ҳодисаси содир бўлганини билдириб, суддан адолатли ҳукм чиқаришни сўраган.

“Сўхликларни жуда қийнаб келган”

Судда марҳумнинг яқинлари Ф.З. “гўёки Фарғонада у зўр эканини кўрсатиб қўйиш учун шундай қилганини” айтган.

“Ф.З. сўхликларни жуда қийнаб келган. Товламачилик йўли билан болалардан пул ундириб келгани ҳақида эшитганман, лекин жиноятларига ўзим гувоҳ бўлмаганман. Ф.З.нинг жиянимда адовати бўлган. У жиянимга гўёки Фарғонада зўри эканини кўрсатиб қўйиш учун шундай қилган”, деган марҳумнинг вакили.

Шунингдек, М.А.нинг турмуш ўртоғи ҳам Ф.З.нинг адовати бўлганини билдирган.

“Турмуш ўртоғимда адовати бўлган. Уни ўлдириш учун қидириб юрганини ҳам эшитганман. Дастлаб турмуш ўртоғим ва судланувчининг муносабати яхши эди. Ф.З. қамоқдан чиққанидан кейин уларнинг ораси ёмонлашди”, деган у ўз кўрсатмасида.

Аёл 4 нафар фарзанди етим қолганини айтиб, суддан уларнинг ҳар бири учун 1 млрд сўмдан жами 4 млрд сўм моддий ва маънавий зарар ундириб беришни сўраган.

Жазо

ЖИБ Ёзёвон туман судининг 2025 йил 4 декабрдаги ҳукми билан Ф.З. Жиноят кодексининг 97-моддаси (қасддан одам ўлдириш) 1-қисмида назарда тутилган жиноятни содир қилишда айбли деб топилган. Унга 14 йил 1 ой муддатга озодликдан маҳрум қилиш жазоси тайинланган.

Ф.З. турли жиноятларни содир қилиб, бунгача 4 марта судланган. Хусусан, ЖИБ Фарғона шаҳар судининг 2018 йил 3 июлдаги ҳукми билан Жиноят кодексининг 267-моддаси (транспорт воситасини олиб қочиш) 2-қисмининг “б,в” бандларида назарда тутилган жиноятни содир қилгани учун 8 йил 1 ойга қамалган. ЖИБ Оҳангарон туман судининг 2022 йил 19 апрелдаги ажримига кўра, ўталмаган 4 йил 14 кун жазоси ахлоқ тузатиш ишлари жазосига алмаштирилган. ЖИБ Фарғона туман судининг 2025 йил 14 январдаги ажрими билан эса ўталмаган 1 йил 4 ой 5 кун жазосини ўташдан муддатидан илгари шартли равишда озод қилинган.

Шу сабабли суд ҳукми билан Ф.З. ўта хавфли рецидивист деб топилди. Тайинланган жазони махсус тартибли колонияларда ўташи белгиланди. Марҳумнинг қонуний вакили фойдасига 250 млн сўм маънавий зарар ундириш белгиланди.

Ф.З. танишини машинасида уриб кетгани аввалроқ хабар қилинган эди. Прокуратура томонидан назорат тартибида ўрганилганда унинг хатти-ҳаракатларида қасддан одам ўлдириш жинояти аломатлари мавжудлиги сабабли, жиноят иши Жиноят кодексининг 97-моддасига қайта малакаланганди.