Alibaba ресторанида официантлар ўрнини технологиялар эгаллади

Alibaba компаниясининг Шанхайдаги ресторанини дунёдаги энг технологик ресторанлардан бири, деб аташ мумкин. У ерда роботлар бошқа қаҳвахоналардаги сингари таом тайёрламайди. Улар инсон бажариши мумкин бўлган ишларни қилишади. Бу ресторанга ташриф буюрган одам ажойиб таассуротларга эга бўлади. Келинг, Business Insider ёрдамида мазкур ресторанга виртуал саёҳат уюштирамиз.

Robot.He деб номланувчи денгиз маҳсулотлари ресторани Alibaba’нинг Hema савдо марказида жойлашган. Сизни эшик олдида маъмур кутиб олади ва бўш стол танлашингиз учун катта сенсор экран олдига бошлаб боради. Ўзингизга керакли миқдорда жойи бўлган қулай жойлашувли столни танлашингиз мумкин.

Стол танланганидан кейин смартфондаги иловадан QR-кодни сканерлаш керак бўлади. Ресторан ходимлари сизнинг қайси столда ўтирганингизни шу тариқа билиб олишади.

Энди супермаркетга бориб, керакли денгиз маҳсулотини танлашнинг айни вақти. Ўзингизга ёққан барча нарсани кассадаги хизматчига берасиз, у бу маҳсулотларни конвейерга жойлайди. Бу босқичда QR-код яна бир марта сканердан ўтказилади. Бу орқали ходимлар сизнинг қандай таом емоқчи эканлигингизни билиб олишади, сизга эса таом тайёр бўлганлиги ҳақида хабар берилади.

Конвейер ичида роботлашган қўл харид қилган маҳсулотларингизни олиб, музлатгичга жойлайди. Бу ерда маҳсулотингиз таомга айланиши учун навбатга қўйилади. Сиз эса ўз столингизга боришингиз мумкин. Истасангиз, QR-код ёрдамида яна бирор нарсага буюртма берсангиз ҳам бўлади. Иловада таомнома мавжуд.

Буюртмангиз тайёр бўлиши билан ошпазлар уни махсус тасмага қўйишади, таом тўғри сизнинг столингизга етиб келади. Овқат махсус контейнерларда келтирилади. Контейнер етиб келиши билан очилади ва сиз ўз буюртмангизни олишингиз мумкин.

Шу тарзда сиз ошхона ходимлари билан мулоқотда бўлишингиз мумкин, аммо Alibaba бу ресторанда официантлар хизматидан бутунлай воз кечди. Буюртмангиз ҳеч кимнинг эсидан чиқмайди ёки алмашиб қолмайди. Официантни кутишга ҳам ҳожат йўқ. Буюртма беришдан бошлаб унинг етиб келишигача барча жараёнлар автоматлашган. Бу ердаги ходимлар эса таом тайёрлаш билан банд бўлишади.