Водийда дастурчилар хакатони бошланди. Фарғонада ғолиблар аниқланди

Хакатонни БМТ Гиёҳванд моддалар ва жиноятчилик бўйича бошқармасининг Марказий Осиёдаги ваколатхонаси, Ёш тадбиркор, Ёшлар ишлари агентлиги ҳамда IT парк ҳамкорлигида ташкил этилди.

Тадбирда фарғоналик дастурчилар 24 соат ичида бетўхтов иш олиб бориб, тундан тонггача учта асосий йўналиш: зўравонлик билан кураш, ишсизликни бартараф этиш ва коррупцияга қарши кураш бўйича IT-ечимларни ҳайъат аъзоларига тақдим этди.

Мусобақа натижасида IlmSoft жамоаси ўзининг болалар зўравонлигига қарши дастури билан ғолиб деб топилди ва HP Omen ноутбуклари билан тақдирланди.

2-ўринни ёшлар учун стажировка ва тажриба талаб этилмайдиган ишларни топиш платформаси лойиҳасини ишлаб чиққан Cactus Corp жамоаси қўлга киритди.

Ёшларни иш билан таъминлаш платформасини таклиф этган MK Group жамоаси совриндор учликни якунлаб берди. Уларга ташкилотчилар томонидан бепул бизнес консултантлар, акселерация дастурлари ва йиллик офис тақдим этилди.

Эндиликда ушбу хакатон Андижон ва Наманган шаҳарларида ҳам бўлиб ўтади.

Эслатиб ўтамиз, 16 ноябрда старт олган хакатон 21 ноябрга қадар давом этади. Унда водийнинг учта вилоятидан 20 нафардан (4 кишидан иборат 5тадан жамоа) – жами 60 нафар иштирокчи қатнашмоқда.