АҚШнинг Европани ажратишга бўлган уринишлари бекор, зеро Вашингтон Евроиттифоқ ўз аъзоларига таклиф қилаётган устунликларни таъминлай олмайди. Франция ТИВ раҳбари Жан-Марк Эйро Journal du Dimanche'га берган интервьюсида шу ҳақида маълум қилди.
"Уларнинг европаликларни ажратишга бўлган ҳар қандай уринишлари зое кетиши борасида баҳслашишим мумкин. Қўшма Штатлар Евроиттифоқ таклиф қилаётган устунликларнинг ҳеч бирини таъминлай олмайди", - дейди Жан-Марк Эйро.
Эйронинг таъкидлашича, ҳатто Буюк Британия бош вазири Тереза Мей ҳам, Бирлашган Қиролликнинг ЕИдан чиқиш тўғрисидаги референдум натижаларига қарамай, АҚШ президенти Дональд Трампга Европани "кучли ҳамкор" сифатида кўриш зарурлигига ишора қилган.
ТИВ раҳбари Франция президентлик сайловларига на Россия ва на АҚШнинг аралашувига йўл қўймаслигини таъкидлаган. "Россия ички ишларга аралашмаслик халқаро муносабатларнинг асосий тамойили ҳисобланишини биринчилардан бўлиб маълум қилиши керак ва мен буни қабул қиламан. Франция ва французлар уларнинг танловини бошқа биров бошқаришига йўл қўймайди", - деди Эйро ва Европадаги барқарорлик ҳам Москва, ҳам Вашингтон манфаатлари учун хизмат қилишига урғу берди.
