Хоккей бўйича жаҳон чемпионатининг барча чорак финалчилари маълум

Фото: newstes.ru

Париж ва Кёльн шаҳарларида бўлиб ўтаётган хоккей бўйича жаҳон чемпионатининг плей-офф босқичи барча иштирокчилари маълум бўлди, деб хабар бермоқда "Р-Спорт".

Германиянинг Кёльн шаҳрида сешанба куни Латвия ва Германия термалари ўртасидаги баҳс билан мусобақанинг гуруҳ босқичи якунланди. Унда биринчилик мезбонлари буллитлар бўйича устун келди. Эндиликда немислар чорак финалда В гуруҳида биринчи ўринни эгаллаган Канада билан тўқнаш келади.

Россиялик хоккейчилар эса сешанба куни АҚШ терма жамоасига 3:5 ҳисобида имкониятни бой беришди ва А гуруҳида иккинчи ўринни қўлга киритишди. Шу тариқа русларнинг плей-оффдаги илк рақиби Чехия термаси бўлади. Америкаликлар чорак финалда Финляндия билан куч синашса, Швеция термаси Швейцария билан учрашади.

Чорак финал баҳслари пайшанба, 18 май куни бўлиб ўтади.

Тайёрлаган: Отабек Матназаров

#жаҳон чемпионати #Хоккей