Америкаликлар Трампдан кўра ФҚБга кўпроқ ишонишлари маълум бўлди

АҚШ президенти Дональд Трамп ва Федерал қидирувлар бюроси фикрлари фарқланса, АҚШнинг аксарият аҳолиси унда Трампдан кўра кўпроқ ФҚБга ишонадилар. Бундан Marist Poll компанияси ўтказган сўровнома маълумотлари дарак бермоқда.

Компания сайтида эълон қилинган маълумотларга кўра, сўралганларнинг 66 фоизи ФҚБга, 24 фоизи эса Трампга ишонишга тайёрликларини айтганлар. Бундан ташқари, респондентларнинг 71 фоизи ФҚБ Трампни ҳокимиятдан четлатишга уринмаётгани ва шунчаки “ўз ишини қилаётганини”, 23 фоизи эса бюро президентга нисбатан нохолис эканлигини айтишган.

Сўровнома 5-7 ферваль кунлари ўтказилган ва унда 807 киши иштирок этган.

Аввалроқ АҚШ конгрессининг разведка қўмитаси “Россиянинг АҚШдаги сайловларга аралашуви” тергови жараёнида ФҚБ ва адлия вазирлиги қоидабузарликларга йўл қўйгани ҳақидаги докладни эълон қилган. Ҳужжатда ФҚБнинг терговда иштирок этган ходимлари Трампга нохолислик қилиб, сайловларда ютқазган Ҳиллари Клинтонни қўллаб-қувватлашгани кўрсатилган.