Россия: АҚШнинг Сурия бўйича сиёсати театрлаштирилган шоу

Фото: ТАСС/Антон Новодережкин

Россиянинг Женевадаги БМТ бўлинмасида доимий вакили Геннадий Гатиловнинг «Известия» газетасига маълум қилишича, Америка Қўшма Штатлари қуролсизланиш масаласига бағишланган конференцияни сиёсийлаштирмоқда ҳамда шу тариқа Суриядаги можарони ҳал этишга тўсқинлик қиляпти.

«Бизда шундай тасаввур пайдо бўлмоқдаки, америкаликлар Женевада қуролсизланиш бўйича конференцияда иштирок этиб, конференция ишини сиёсийлаштирмоқчи ва Сурияни қатор халқаро конвенцияларга риоя этмаётган, кимёвий қуролни қўллаётган давлат сифатида айблашмоқчи. Уларнинг позицияси шундан иборатки, ушбу давлат қуролсизланиш бўйича органни бошқаришга мос эмаслиги ҳақида ҳаммага очиқ баёнот бериш», - дея айтиб ўтди Гатилов.

Аввалроқ АҚШнинг Женева конференциясидаги доимий вакили Роберт Вуд Суриянинг конференцияда раислик қилиши «театрлаштирилган шоу» экани ҳақида баёнот берганди. Ўз навбатида, Гатиловнинг маълум қилишича, АҚШнинг ўзи конференцияни «театрлаштирилган шоуга» айлантирмоқда.

Эслатиб ўтамиз, бундан аввал Сурия президенти Башар Асад Америка Қўшма Штатлари Сурия ҳудудидан чиқиб кетиши кераклигини айтганди.

Тайёрлаган: Отабек Матназаров

#Россия #АҚШ #Сурия

Сурияда 2011 йилда бошланган фуқаролар уруши мамлакатни бир неча қисмларга бўлиб ташлаган. Сурия ҳукумати, ИШИД, курдлар ва бошқа турли жангари гуруҳлар ўртасидаги қуролли тўқнашувлар ҳамон давом этмоқда.