Хитойда вирус қурбонлари сони 361 нафарга етди

Хитойда янги коронавирусдан вафот этганлар ва касалланганлар сони тобора ошмоқда. Охирги маълумотларга кўра, вирусдан бир кун ичида 57 киши вафот этди.

Фото: EPA-EFE/STRINGER

Шу тариқа, эпидемия бошлангандан бери унинг қурбонлари сони 361 нафарга етди, касалланганлар эса яна 2829 кишига кўпайиб, 17205 нафарни ташкил қилмоқда.

56 та ўлим вирус тарқалиш ўчоғи ҳисобланган Хубэй вилоятида, яна биттаси Чунцин шаҳрида қайд этилган.

Мамлакатда 152,7 минг киши вирус юқтирганликка гумон остида қолмоқда. 475 киши муваффақиятли даволаш курсидан сўнг шифо топган.

Бир кун аввал вирус қурбонлари сони 304 нафарни, касалланганлар эса 14,4 минг кишини ташкил этаётгани маълум қилинганди.

South China Morning Post нашрининг хабар беришича, Хитойдан ташқарида дунё бўйлаб 182 киши вирусга чалинган.

Тайёрлаган Шуҳрат Раҳимов

#Хитой #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.