Уханда дастлабки хорижий фуқаролар коронавирусдан вафот этди

Ўз фуқароларининг ўлимини АҚШ ва Япония элчихоналари тасдиқлади. Янги вируснинг қурбонлари сони 700 кишидан ошди

Фото: Xiao Yijiu/Xinhua via AP

Коронавируснинг тарқалиш ўчоғи бўлган Уханда хорижий фуқаролар орасида дастлабки қурбонлар қайд этилди. Reuters агентлигининг АҚШнинг Пекиндаги элчихонасига таяниб хабар қилишича, шаҳарда америкалик фуқаро вафот этди.

New York Times маълумотларига кўра, гап 60 ёшли аёл ҳақида бормоқда, унда касалликни юқтириб олишдан аввал саломатлиги билан боғлиқ муаммолар бўлган. Унинг қачон касалхонага ётқизилгани ҳақида маълумот йўқ.

АҚШнинг ўзида 12 киши касалланган деб ҳисобланмоқда. Қўшма Штатларда ўлим билан тугаган ҳолатлар кузатилмади.

Ўз навбатида, Япония Ташқи ишлар вазирлиги хабарига кўра, ушбу мамлакат фуқароси ҳам Ухандаги касалхонада вафот этган. У коронавирусга гумонланиб касалхонага ётқизилган ва пневмониядан (зотилжам) вафот этган.

Сўнгги маълумотларга кўра, 724 киши декабрь ойида Уханда пайдо бўлган коронавирус қурбонига айланди. Уларнинг аксарияти Хубэй провинциясида вафот этди.

Хитойнинг материк қисмидан ташқарида икки киши ҳаётдан кўз юмди: Ҳонконг ва Филиппинда биттадан ўлим ҳолати қайд этилди.

Бундан олдин, қурбонлар сони бир кунда 88 кишига ортгани хабар берилганди.

Тайёрлаган Отабек Матназаров

#коронавирус #Ухан

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.