Толиблар Афғонистонда демократик тузум ўрнатилмаслигини маълум қилди

Воҳидулла Ҳошимийнинг сўзларига кўра, мамлакатда демократия учун асос йўқ ва бу ерда қабул қилинадиган ягона сиёсий тузум шариат қонунлари бўлади.

Фото: Reuters

«Толибон» ҳаракати Афғонистонда демократик тузум ўрнатмайди, деди ҳаракатнинг юқори мартабали аъзоларидан бири Воҳидулла Ҳошимий Reuters агентлигига.

Унинг сўзларига кўра, мамлакатда демократия учун асос йўқ ва бу ерда қабул қилинадиган ягона сиёсий тузум шариат қонунлари бўлади.

Ҳошимий Афғонистонни «Толибон» бошқарув кенгаши бошқариши, Ҳайбатулла Охундзода олий етакчи бўлиши мумкинлигини айтди.

У шунингдек, янги миллий армия тузиш режаси ҳақида сўз юритиб, армия сафига ҳукумат қўшинлари ҳарбийлари ҳам қўшилиши мумкинлигини билдирди.

Аввалроқ толиблар матбуот анжумани ўтказиб, Афғонистонда қонун ва тартиб ҳукмрон бўлиши, ҳеч кимдан қасос олинмаслиги ва аёлларнинг шариатдаги ҳуқуқлари ҳимоя қилинишини маълум қилганди.

Тайёрлаган: Дилшод Аскаров

#Афғонистон #толибон