Автомобилни ижарага бериш тартибига ўзгартиришлар киритилди

Фуқаролик кодексига тегишли ўзгартириш ва қўшимчалар киритилди.

Фото: Getty Images

Президент «Фуқаролар ва тадбиркорлик субъектлари ҳуқуқлари кафолатлари янада кучайтирилиши муносабати билан айрим қонун ҳужжатларига ўзгартиш ва қўшимчалар киритиш тўғрисида»ги қонунни имзолади.

Ҳужжатга кўра, Фуқаролик кодексининг 565-моддасига (транспорт воситасини ижарага бериш шартномасининг шакли) ўзгартириш ва қўшимчалар киритилди.

Хусусан, эндиликда автомототранспорт воситаларини электрон онлайн-аукцион орқали электрон савдо платформаси ёрдамида ижарага беришда ижара шартномаларини нотариал тасдиқлаш талаб этилмайди.

Шу билан бирга, электрон онлайн-аукцион натижалари бўйича тузилган баённома ижара шартномаси кучига эга.