Али Ламине Зейне Нигерга қарши ЭКОВАС санкцияларини «адолатсиз чақириқ» деб атади. У Нигер халқи ўз суверенитетини ҳимоя қилиш йўлини танлаганини таъкидлади.
Нигернинг янги бош вазири Али Ламине Зейне Ғарбий Африка давлатлари иқтисодий ҳамжамиятини (ЭКОВАС) ҳарбий тўнтаришдан кейин ўз мамлакатига қарши санкциялар жорий этганини танқид қилди, бироқ Нигер бу муаммони енгиб чиқишига ишонч билдирди. «Бизга қарши жорий этилган санкциялар адолатсиз чақириқ бўлса-да, биз уни енгиб ўтишимизга ишонаман. Биз уни енгиб ўтамиз», деди у 14 август, душанба куни DW медиакомпаниясига берган эксклюзив интервьюсида.
Зейне Нигердаги ҳарбий тўнтаришни қўллаб-қувватлади. «Халқимиз суверенитетни ҳимоя қилишга ва бунга рози бўлмаган ҳар қандай ҳукуматни ағдариб ташлашга қарор қилди. Одамлар янги ҳокимиятга ишониши керак, чунки биз ўз ҳаракатларимизни уларга тўлиқ ҳалоллик билан хизмат қилишга қаратганмиз», деди у.
Нигернинг янги бош вазири қўшни Нигерия делегациясининг Нигерга ташрифи ва ЭКОВАС билан музокаралар ҳақида оптимизм билдирди. «Бу бизга ишонч бағишлайди, чунки Нигерия делегацияси Нигерия жамиятида маълум бир позиция учун ажралмас бўлакдир», деб тушунтирди у.
ЭКОВАС билан ҳамкорлик
Зейне Нигер, Нигерия ва ЭКОВАС ўртасидаги чуқур тарихий умумийликни қайд этиб, ушбу умумийликни сақлаб қолишдан манфаатдорлигини, шунингдек, ЭКОВАСда биринчи навбатда иқтисодий масалаларга эътибор қаратилиши кераклигини таъкидлади.
«Бирдамликнинг асосий принципи - жамиятнинг барча аъзоларига фаровонлик учун шароит яратишга имкон бериш ва ҳар бир мамлакат ҳамжамиятдаги бу ҳамжиҳатликдан фойда олишини таъминлаш. Аммо, агар биз сиёсий ва ҳарбий тамойиллар олдинги планга чиқаётганини кўрсак, у ҳолда бу жуда ачинарли бўлади», - деди Али Ламине Зейне.
