Каталония миллий кунида минтақа аҳолиси анъанавий тарзда Испаниядан ажралиб чиқиш бўйича намойиш ўтказди.
Барселона марказида «Диада» миллий байрами муносабати билан ўтказилган акцияда ўн минглаб каталонияликлар минтақа мустақиллиги учун чақириқлар билан қатнашди, деб хабар берди dpa 11 сентябр, душанба куни.
Юришдан кейин намойишчилар Барселона марказидаги Испания майдонига тўпланди. Акция ташкилотчиларига кўра, унда 800 минг киши қатнашган, полиция 115 минг иштирокчи ҳақида маълум қилган. Баҳолашда нега бундай бўшлиқ пайдо бўлгани номаълум, дея қайд этади dpa.
Мамлакат парламентининг тақдири Каталония партияларига боғлиқ
Каталония минтақавий ҳукумати раҳбари Пере Арагонес митинг олдидан Испанияда янги ҳукуматни шакллантиришда минтақа партияларининг бирданига ортиб бораётган роли бўйича имкониятни қўлдан бой бермаслик кераклигини айтди. 11 сентябрда нишонланадиган Каталония миллий куни анъанавий тарзда сиёсий ҳаракатлар ва маҳаллий сиёсатчиларнинг чақириқлари билан бирга ўтади.
Бу йил байрам муносабати билан ўтказилган акциялар бутун Испанияда алоҳида эътибор билан кузатилди, дея қайд этади dpa. Каталониядаги сепаратистик партиялар бирданига мамлакат парламенти тақдирида муҳим рол ўйнай бошлади. Келгуси бир неча ҳафта ичида ҳукумат раҳбари вазифасини бажарувчи Педро Санчес кўпчилик қўллаб-қувватловига эга бўлиб, мамлакатни бошқаришда давом этадими ёки янги сайловлар ўтказилиши керакми, кўп жиҳатдан уларга ва уларнинг овозларига боғлиқ, деб ёзади dpa.
