Россиянинг ЦСКА клуби аъзоси Иван Обляков жамоадоши, ўзбекистонлик Аббосбек Файзуллаев барчани палов билан меҳмон қилганини айтди.
ЦСКА футбол клуби етакчиларидан бири Иван Обляков ўзбекистонлик Аббосбек Файзуллаевни жамоа қандай қабул қилгани ҳақида гапириб берди. Ёш легионер сентябр ойида «армиячи»ларнинг энг яхши футболчиси деб топилган эди.
— Уни қандай кутиб олишди? Истеъдодни дарҳол пайқадингизми?
— Биринчи машғулотлардан буни айтиш қийин эди ва унга вақт керак эди. Кейин у мослашди, биз уни яхши қабул қилдик, у билан мулоқот қиламиз, у яхши йигит. Унинг яхши фазилатлари бор, ҳаётда камтарин, лекин футбол майдонида унинг кўп ҳаракат қилаётганини, меҳнат қилаётганини кўриш мумкин. Ва у жамоага ёрдам бермоқда, албатта.
— Машғулотлардан бирига 30 килограмм ўзбек паловини олиб келгани ростми?
— Ҳа, яқинда шундай бўлди. Биз машғулот ўтказаётган эдик, у қаердандир палов буюрди. Битта катта қозонда палов олиб келишди, шунинг учун ҳаммамиз мазали тушлик қилдик.
Аббосбек Файзуллаев шу йилнинг август ойида Россия чемпионатига кўчиб ўтди. У «Пахтакор» клуби тарбияланувчиси ҳисобланади. 19 ёшли яримҳимоячи трансфери учун ЦСКА клуби «Пахтакор»га 500 минг евро тўлаши хабар қилинди. Файзуллаев ЦСКА билан «3+1» кўринишида шартнома имзолади.
ЦСКА клубидаги фаолияти давомида Файзуллаев «Ростов» дарвозасига гол урди, «Криля Советов»га қарши ўйинда Фёдор Чаловга голли узатма берди.
