2024 йилда Ўзбекистонга инвестициялар миқдори қарийб 50 фоизга қисқарди — ESCAP

2024 йил якунларига кўра, Ўзбекистонга жалб қилинган инвестициялар ҳажми ўтган йилга нисбатан 49 фоизга камайди ва 4 миллиард долларни ташкил қилди. Бу ҳақда БМТ ҳузуридаги Осиё ва Тинч океани иқтисодий ва ижтимоий комиссияси (ESCAP) томонидан эълон қилинган ҳисоботда (.pdf) маълумот келтирилди.

Қайд қилинишича, 2024 йилда Қозоғистон Шимолий ва Марказий Осиёда инвестиция жалб этиш бўйича етакчига айланди — мамлакат янги лойиҳаларга 15,7 миллиард доллар жалб қилди. Бу эса инвестициялар ҳажми ўтган йилга нисбатан 88 фоизга ошганини англатади. Умуман олганда, минтақага жалб қилинган барча инвестициялар ҳажмининг 63 фоизи Қозоғистон ҳиссасига тўғри келади.

Рўйхатнинг кейинги ўринларида қуйидаги давлатлар жой олган:

- Ўзбекистон — 4 миллиард доллар (-49%);

- Қирғизистон – 2,1 млрд доллар (+310%);

- Озарбойжон — 1,2 миллиард доллар (+1%);

- Туркманистон — 339 миллион доллар;

- Гуржистон - 126 миллион доллар;

- Арманистон – 67 миллион доллар.

Таъкидланишича, халқаро компаниялар минтақада, айниқса, рақамлаштириш, технологик инновациялар ва яшил энергия соҳасидаги лойиҳаларга қизиқиш билдирмоқда.

«Шу нуқтаи назардан, инвестиция агентликлари ва тегишли вазирликларнинг фаол фаолияти алоҳида аҳамият касб этмоқда. Янги йўналишларнинг муваффақияти нафақат қулай сиёсат яратишга, балки барча босқичларда инвесторларни қўллаб-қувватлашга, жумладан, инвестициядан кейинги қўллаб-қувватлашга ҳам боғлиқ», дейилади ҳисоботда.