АҚШ Гуантанамодаги 11 нафар маҳбусни озод этди

АҚШ ҳукумати Гуантанамо қамоқхонасида ҳибсда сақлаб келинган 11 нафар маҳбусни озод этди. Мудофаа вазирлигига кўра, гап яманлик маҳбуслар ҳақида кетмоқда.

Идора маълум қилишича, «Қўшма Штатлар миллий хавфсизлиги манфаатлари» учун улар Яманга қўшни Ўмон давлатига юборилади. АҚШ администрацияси Гуантанамодаги маҳбуслар сонини қисқартириш ва ушбу қамоқхонани ёпиш мақсадига эришишда ёрдам берган Ўмон ҳукуматига миннатдорчилик билдиради.

The New York Times’нинг ёзишича, 11 нафар яманликка айбловлар эълон қилинмаган, аммо улар ўз ватанидаги фуқаролик уруши сабаб депортация қилинмай келинган.

2024 йил декабр ойида АҚШ президенти Жо Байден Гуантанамонинг тўрт нафар маҳбусини озод этганди. Ҳозирда ушбу қамоқхонада 15 маҳбус қолмоқда, улар орасида 2001 йил 11 сентябрдаги теракт ташкилотчиларидан сифатида гумонланган Ҳолид Шайх Муҳаммад ҳам бор.

У икки шериги билан ўтган йилнинг июл охирларида тергов билан келишувга эришишга уринган эди. Аммо Пентагон раҳбари Ллойд Остин судгача бўлган келишувни бекор қилганди.

2001 йилда АҚШга террорчилик ҳужуми

2001 йил 11 сентябрдаги теракт — АҚШ тарихидаги энг йириги, унда 3000 га яқин киши ҳалок бўлган. Террорчилар ўғирлаб кетилган учта йўловчи самолётини Ню Йоркдаги Бутунжаҳон савдо маркази ва Вашингтон яқинидаги Пентагон биносига олиб бориб урган. Тўртинчи самолёт Пенсилванияда ҳалокатга учраган.

Гуантанамо қамоқхонаси 2001 йил 11 сентябрдаги терактлардан кейин АҚШ президенти Жорж Буш даврида террорчиликда гумон қилинганларни судсиз ушлаб туриш учун ташкил этилган. Унинг энг «гавжум» пайтида у ерда 800 га яқин одам бор эди. Инсон ҳуқуқлари гуруҳлари узоқ вақтдан бери лагерни ёпишга чақириб келишган, бироқ оз сонли маҳбуслар ҳамон у ерда сақланмоқда.