Қатар ва Ўзбекистон ўртасида тўғридан тўғри рақамли кабеллар ўрнатилиши мумкин 

Муаллиф мақолада сунъий интеллект, портлар, аэропортлар ва чегараларни ҳимоя қилиш, ёнғин ва қутқарув, киберхавфсизлик ва кибертаҳдидлар каби муҳим мавзуларни муҳокама қилиш учун глобал лидерларни бирлаштирган Milipol Qatar кўргазмаси ҳақида сўз юритади.

Мақолада таъкидланишича, 2024 йилда мазкур тадбирда Ўзбекистон ички ишлар вазири, генерал-лейтенант Пўлат Бобожонов бошчилигидаги юқори даражали делегация иштирок этиб, мамлакатнинг сунъий интеллект ва рақамли трансформация стратегияларини илгари сурди.

"Ўзбекистоннинг жадал ривожланаётган рақамли иқтисодиёти маълумотлар марказларига бўлган талабни ошириб, сармоя киритиш учун кенг йўл очмоқда. Қатар маълумотлар марказлари ва тегишли объектларга стратегик инвестициялар киритиш орқали ушбу инфратузилмани кенгайтиришни қўллаб-қувватлашда ҳал қилувчи роль ўйнаши мумкин", - дейилади нашрда.

The Peninsula газетасига кўра, Қатар ва Ўзбекистон ўртасида тўғридан тўғри рақамли кабелларни ўрнатиш ташаббуслари маълумотлар алмашинувини сезиларли даражада яхшилаши, халқаро рақамли алмашинувлар ва телекоммуникация инфратузилмасига сармоя киритиш учун янги имкониятлар яратиши мумкин.

"Ўзбекистон ахборот технологиялари ва сунъий интеллект соҳасида ўзининг истеъдодлар захирасини фаол ривожлантирмоқда, бу соҳада 100 мингдан ортиқ мутахассислар ишламоқда. "Бир миллион дастурчи" каби ташаббуслар ва Cisco and Coursera каби йирик технология компаниялари билан ҳамкорлик юқори малакали мутахассисларнинг доимий тармоғини яратмоқда", - деб ёзади муаллиф.

Қайд этилишича, Қатар корхоналари малакали ишчиларни аутсорсинг қилиш ва рақамли инновацион лойиҳаларда ҳамкорлик қилиш орқали Ўзбекистоннинг ўсиб бораётган истеъдодлар жамғармасидан фойда олишади.