Илк ўзбек компанияси Google’нинг сунъий интеллект дастурига қабул қилинди

“Heemera” МЧЖ Googleʼнинг нуфузли “Google Accelerator: AI First Program” дастурига қабул қилинди. Бу ҳақда истиқболли лойиҳалар миллий агентлиги (ИЛМА) хабар берди.

Агентликнинг маълум қилишича, бу билан “Heemera” МЧЖ Googleʼнинг ушбу дастурига қабул қилинган илк ўзбек компанияси бўлди.

Акселератор дастурига қўшилиш “Heemera”га Google мутахассислари ва экотизимининг техник ҳамда бизнес тажрибасидан фойдаланиш имконини беради. Компания шунингдек, шахсий ёрдам, махсус тренинглар, мураббийлик кўмаги ҳамда маҳсулотларини ривожлантириш стратегияси бўйича маслаҳатлар олади

Дастур доирасида “Heemera” Google жамоаси билан ҳамкорликда блокчейн таҳлили, крипто-терговлар ва крипто-активларни қайтариш соҳасидаги сунъий интеллект ечимларини такомиллаштиради. Бундан ташқари, ўз бизнесини халқаро миқёсда кенгайтиришга ҳам йўналтирилади.

“Heemera”нинг ушбу акселераторга қабул қилиниши Ўзбекистонда крипто-активлар айланмаси ва сунъий интеллект йўналишида инновацион лойиҳаларни ривожлантириш учун муҳим қадам бўлиб хизмат қилади. Бу эса мамлакатнинг криптоиндустрия ва замонавий технологик ечимлар бўйича минтақавий марказ сифатидаги мавқеини мустаҳкамлашга ёрдам беради”, - дейилади расмий хабарда.

Аввалроқ Ўзбекистонда тўлов воситаси сифатида (криптовалюта тури) стейблкоинлардан фойдаланишга рухсат берилиши мумкинлиги маълум қилинганди. Бу борада ИЛМА ва Марказий банк ҳамкорликда ишламоқда.