Эрон уранни бойитиш ва ракета дастуридан воз кечмайди

Эрон ТИВ раҳбари Аббос Ароқчи Теҳрон уранни бойитиш ва ракета дастурини ривожлантиришни давом эттириш ниятида эканини, бироқ АҚШ билан ядровий муаммолар бўйича муросага келиш имкониятидан воз кечмаётганини айтди.

«Биз уранни бойитишни тўхтата олмаймиз, (...) Вашингтон билан тўғридан-тўғри мулоқот қилишни истамаймиз. Билвосита музокаралар орқали келишувга эришиш мумкин», деб унинг сўзларини келтирди Mehr агентлиги.

«Биз ядро дастуримиздан хавотирланиш сабаблари ҳақида гапиришга тайёрмиз. Унинг тинчликсеварлигини эслатиб ўтамиз. Ҳалол келишув тузиш мумкин, аммо Вашингтон амалга ошириб бўлмайдиган ва қабул қилиб бўлмайдиган дастлабки шартларни илгари сурмоқда. Бизнинг ракета дастуримиз бўйича музокаралар бўлмайди», деб аниқлик киритди вазир.

Унинг сўзларига кўра, 2025 йил июнь ойида Исроил ва АҚШ зарбаларидан сўнг ядровий материаллар бомбардимон қилинган объектлар остида қолиб кетган ва Эрон уларни ҳеч қаерга олиб чиқмаган. Вазир бинолар ва ускуналарга зарар етганини тан олди, бироқ Эрон технологиялардан фойдаланиш имкониятини йўқотмади.

Унинг ишонтиришича, Теҳрон Исроилнинг «душманона хатти-ҳаракатларини» кутмоқда, у билан июнь ойидаги тўқнашувдан сабоқ олган ва ҳар қандай сценарийга тайёр. Ароқчининг қўшимча қилишича, Исроил АҚШ розилигисиз Эронга қарши янги ҳужумга бормайди.

Октябрь ойи охирида ХАЭА бош директори Рафаэл Гросси Associated Press агентлигига берган интервьюсида Эрон, маълумотларга кўра, уранни бойитишда давом этаётганини, аммо бу жадал суръатларда эмаслигини айтди.

Исроил 13 июнь куни Эронга қарши ҳарбий операция бошлади, унинг мақсади Эрон ядровий дастурини йўқ қилиш экани айтилди. Бунга жавобан Исроилга зарбалар берди.

22 июнь куни АҚШ Эрондаги учта ядровий объектга зарба берди: Фордо, Исфахон ва Натанз. Кейинчалик АҚШ президенти Доналд Трамп сулҳ эълон қилди, Эрон ва Исроил бунга рози бўлди.