11710

Kun.uz: Ўзбекистонда оналик ўлими 2001 йилдан ҳозирги кунгача уч марта камайган. Бу ҳақда 1 майда бўлиб ўтган Ўзбекистон ҳукумати ва БМТнинг Мингйиллик ривожланиш мақсадларига эришиш бўйича берилган ҳисоботда айтилмоқда.

2009-2013 йилларда Ўзбекистоннинг 227 та туғруқхонаси замонавий тиббиёт ускуналари билан жиҳозланди, етти вилоятда янги марказлар яратилди.

Ҳисоботга кўра, Ўзбекистонда оналик ўлими коэффициенти 2001 йилдаги 100 минг туғруққа 34,1 та ҳолатдан 2013 йилдаги 20,0 ҳолатгача камайган.

Ҳомиладор аёлларнинг ҳомиладорликнинг биринчи 12 ҳафтасида туғруққача парвариш билан қамралганлиги 2002 йилдаги 87,9 фоиздан 2013 йилда 89,5 фоизгача кўтарилган. Туғруқ пайтида қон кетиш (44 фоиз), юқумли касалликлар (10 фоиз) ва кечки токсикозлар (6 фоиз) ҳамон оналик ўлимининг асосий сабаблари бўлиб қолмоқда.

Ҳисоботда контрацептив воситалардан фойдаланиш даражаси ўсиши билан абортлар сони 2002 йилдаги минг туғруққа 8,7 ҳолатдан 2013 йилдаги 4,3 ҳолатгача камайгани айтилмоқда. Ижтимоий тадқиқотлар институти берган маълумотларга кўра, 2013 йилда ҳомиладор бўлишдан сақлайдиган воситалардан фойдаланиш кўрсаткичи шаҳар ва қишлоқ жойларида деярли бир хил бўлган.

“Оналик ўлимининг камайиши оналик ва болаликни муҳофаза қилиш тизимининг моддий-техник базасининг яхшиланиши, туғруқгача кузатув билан қамранганликнинг ошишиши, перинатал хизматлар олишнинг яхшиланишига кўмак берди”, – деб айтмоқда ҳисобот муаллифлари.