Android One дастурининг таъсири борган сари кенгайиб бормоқда: Туркияда 15 майдан сотувга чиқариладиган General Mobile 4G смартфони намойиш қилинди.

Android One дастурининг ғояси Android операцион тизимида ишлайдиган арзон уяли телефонлар яратишда ишлаб чиқарувчиларга ёрдам беришдан иборат. Бунинг учун Google компанияси кейинчалик бошқа компаниялар ўзларининг қурилмаларида асос сифатида фойдаланишлари мумкин бўлган эталон платформалар яратади.

Ҳозиргача Android One қурилмалари анчагина ўрта миёна кўрсаткичларга эга эди. Бундай қурилмалар одатда 854 × 480 пиксел кўрсатиш қобилиятига эга 4,5 дюймли экран, 4 та ядрога эга MediaTek процессори, 1 Гб тезкор хотира ҳамда 4 ёки 8 Гб ли флеш-хотира билан жиҳозланарди.

General Mobile 4G ҳозирги кунда Android One смартфонлари ичида энг қувватлиси ҳисобланади. Янги қурилма 4 та ARM Cortex A53 ядросига эга 64 битли Qualcomm Snapdragon 410 процессори ва Adreno 306 график контроллёри асосида яратилган. Қурилманинг тезкор хотираси 2 Гбни, флеш-хотираси 16 Гб ни ташкил қилади.

Шунингдек, смартфон 1280 × 720 пикселли 5 дюймли сенсорли экран билан жиҳозланган. Экран ташқи таъсирлардан Gorilla Glass 4 ойнаси билан ҳимояланган. Смартфоннинг олд қисмида селфи ишқибозлари учун 5 Мп ли камера, орқа томонида эса светодиодли вспишкага эга 13 Мп ли асосий камера ўрнатилган.

Смартфонга икки йил ичида янгиланиб турилиши кафолатланган Android 5.1.1 операцион тизими ўрнатилган. 4-авлод LTE мобиль тармоқларида ишлашни қўллаб-қувватлайди.

Mobile 4G нинг нархи 260 долларга яқинни ташкил қилиши тахмин қилинмоқда, бу эса аввалроқ ишлаб чиқарилган, 100-110 долларга таклиф қилинаётган Android One қурилмаларидан анча қимматроқ нархни ташкил этади.