Испания чемпионатининг 37-турида сафарда амалдаги чемпион “Атлетико Мадрид” майдонига сафар қилган “Барселона” кичик 0:1 ҳисобидаги ғалабага эришди. 

Бу ғалаба “каталонияликлар” учун 2014/2015 йилдаги Ла-лигада муддатдан олдин чемпионликни қўлга киритиш имконини берди.

Учрашувдаги ягона голни Месси киритди. 

Сўнгги турда “Барселона” ўз уйида “Депортиво”ни қабул қилди. “Депортиво” “Барселона”ни чемпионлик йўлкасида кутиб олди.

 

Учрашув 2:2 ҳисобдаги натижа билан якунланди. Чемпионлар сафидаги 2 голни ҳам Лионель Месси киритди. 

Бу клубнинг Испания чемпионатидаги 23-чемпионлиги бўлди. 

 

Ушбу учрашувда 2014 йилнинг ёзида "Арсенал"дан сотиб олинган Томас Вермален дебют қилди. 

Жорий мавсумдан сўнг ўз фаолиятини Қатар чемпионатида давом эттиршини маълум қилган Хавини "Ноу Камп"да мухлислар илиқ кутиб олишди. 

Мухлислар стадионга "Раҳмат Хави. 17та мавсум. 1998-2015" ёзувлари битилган баннерларда ташриф буюришди.

Испаниялик футболчи "каталонияликлар" таркибида 17та мавсумни ўтказган. 

Хави учрашувнинг сўнгги дақиқаларида майдонни тарк этди. Унинг жамоанинг иккинчи сардори Андрес Иньеста ўйинни давом эттирди. Бу икки ярим ҳимоячи сўнгги 10 йилликнинг энг кучли жуфтлиги дейишга арзирли. 

Футболчига мураббий ҳамда клубнинг бошқа аъзолари миннатдорчилик билдирди. 

Ўйин якунлач, жамоа сардорини кўкка отиб қутлашди.

Учрашувдан сўнг Хави мухлислар билан хайрлашув сўзини айтди:

"Барчаси учун сизларга катта раҳмат. Мен бугун дунёдаги энг бахтли инсонман. Мен бу ерда 17 йил тўп сурдим. Бу дунёнинг энг яхши клуби. Бизга яна икки кубок - Испания кубоги ҳамда Чемпионлар лигаси кубоги зарур. Чемпионлар лигасидаги ғалабани шу ерда, "Ноу Камп"да сизлар билан бирга нишонлаймиз.

Оиламга, турмуш ўртоғимга, дўстларимга, шунингдек, бугун "Ноу Камп"га ташриф буюрган барчага чексиз миннатдорчилигимни билдираман".

Хави жамоанинг Испания чемпионатидаги 23-кубогини боши узра баланд кўтарди. 

Жамоанинг ёш футболчилари ўз сардорлари билан эсдалик учун суратга тушишди.

Клубнинг бразилиялик ўйинчилари ғолибликни ўзлари хос усулда нишонлашмоқда.  

Жамоа дарвозабонлари чемпионликни нишонлашмоқда. 

"Барселона" таркибида илк мавсумини ўтказган ўйинчилар: Ракитич ҳамда Суарес. 

Жамоа тўпурари Лионель Месси ўғли Тьяго билан бирга.

Маълумот учун, "Барселона" жорий мавсумда Ла-лигада 38та учрашувда 30та ғалаба, 4та дуранг ҳамда 4та мағлубиятга учраб, 94 очко тўплашга муваффақ бўлди. 

Клуб бу мавсумда яна икки кубокни қўлга киритиши мумкин. Улар Қирол кубогида "Атлетик Бильбао" билан тўқнаш келса, Чемпионлар лигасида "Ювентус" билан куч синашади.