Футбол бўйича 2015 йилги Ўзбекистон чемпионатининг Олий лигаси 15-туридан ўрин олган "Шўртан" ва "Металлург" жамоалари ўртасидаги учрашув белгиланган вақтдан 1,5 соат кеч бошланди.

Бунга аввалига иссиқ ҳарорат сабаб бўлгани айтилган. Лекин маълум бўлишича, ўйин ҳакамлари Ғузор шаҳрига ўз вақтида етиб боришмагани бунга сабаб бўлган.

Ушбу ўйин 30 июнь куни Тошкент вақти билан соат 19:00да бошланиши керак бўлган, аммо стадионга ташриф буюрган 4756 нафар мухлис ўйин бошланишини соат 20:30гача кутишган.

Ўйинни тошкентлик Дмитрий Пислегин бошчилигидаги ҳакамлар жамоаси бошқарган. Ўйинда меҳмонлар, "Металлург" жамоаси 3:0 ҳисобида ғалаба қозонган.