Данни Блинд Голландия терма жамоасига янги бош мураббий этиб тайинланди. Нидерландия Қироллик футбол уюшмаси Блинд билан 3 йиллик шартнома имзоланганини расман тасдиқлади.

53 ёшли мутахассис Данни бунгача 30 июнь куни истеъфо берган Гус Хиддинкнинг ёрдамчиси сифатида ишлаб келаётган эди. У 2005-2006 йилларда "Аякс" жамоасида бош мураббий сифатида ишлаган, 2008-2015 йиллар давомида эса шу жамоада спорт ишлари директори сифатида фаолият кўрсатганди.

Аслида Блинд Хиддинкнинг ўрнини Евро-2016дан сўнг эгаллаши кутилаётганди. Лекин саралаш баҳсларидаги қониқарсиз натижалар сабаб Хиддинк муддатидан олдинроқ истеъфога чиқарилди.

Гус бошчилигида голландлар ўтказилган 10та учрашувдан атиги 4тасида ғалаба қозонишди. Голландия терма жамоаси Блинд бошчилигидаги илк учрашувни 3 сентябрь куни гуруҳ пешқадами Исландияга қарши ўтказади.