"Зенит"нинг украиналик ярим ҳимоячиси Анатолий Тимощук ўз футболчилик фаолиятини Қозоғистон чемпионатида давом эттирадиган бўлди. У "Қайрат" жамоаси билан 1,5 йиллик шартнома имзолаган. Бу ҳақда Sport.kz хабар берди.

"Қозоғистоннинг энг етакчи жамоаларидан бири билан битим имзолаганимдан хурсандман. Менда бир қанча яхши таклифлар бўлганди, лекин мен Олма-отада ўйнашни танладим. Бу шаҳар менга ёқади. Қолаверса, бу шаҳарда футбол инфраструктураси ҳам ривожланган. Жамоа ўз олдига катта мақсадлар қўйган ҳамда мен бу мадсадларнинг амалга оширилишига ўз ҳиссамни қўшмоқчиман", деб бу қарорини изоҳлайди Тимощук.

Маълумот учун, Тимощук дастлаб "Шахтёр" жамоасида ўзини кўрсатган, 2007 йилда "Зенит"га, 2009 йилда "Бавария"га ўтганди. 2013 йилда яна "Зенит"га қайтган ушбу футболчи асосий таркибдан муқим ўрин олмагач, питерликлар билан шартномасини узайтирмади.

36 ёшли ушбу футболчи Украина терма жамоасида 140 марта майдонга тушган, "Зенит" билан икки марта Россия чемпиони бўлиб, бир марта УЕФА Кубогини қўлга киритган.