Рамазон Қуръон ойидир. Бу қутлуғ ойда Қуръони Карим нозил бўлган. Набий алайҳиссалом бу ойнинг ҳар кечасида Жаброил алайҳиссалом билан биргаликда Қуръони каримни такрорлаб, мустаҳкамлаб олардилар. Вафот топадиган йилларида эса Аллоҳнинг китобини бу улуғ фаришта назоратларидан икки марта ўтказиб олганлар. У зот Рамазон ойида Қуръон тиловатини кучайтириб, тунги намоздаги қироатларни узайтирар эдилар. Набий соллаллоҳу алайҳи ва салламнинг йўлларини маҳкам ушлаган салафи солиҳларимиз бу ойда Қуръонни бир неча бор хатм қилиб чиқишарди. Улардан айримлари хатмни ҳар беш кунда тугатсалар, бошқалари уч кунда хатм қилардилар.
Хабарингиз бор айни кунларда мамлакатимиздаги кўплаб жоме масжидларида Қуръони карим хатм қилинмоқда. Пойтахтимиздаги “Шайх Зайниддин” жоме масжидида ҳам 17 июнь санасидан таровеҳ намозлари бошланиб, унда Қуръони Карим тиловат қилинмоқда. Яратганга шукрлар бўлсин, шу кунга қадар Ҳасан қори ва Насруллоҳ қорилар Қуръони Каримнинг 28 жузини тиловат қилиб бўлишди. Жоме масжидда Қуръони Карим 7 июль, яъни эртага хатм қилиниши режалаштирилган. Дуолар ижобат бўладиган онлар, улуғ лаҳзалардан баҳраманд бўлинг!

“Шайх Зайниддин” жоме масжиди матбуот хизмати.