АҚШ президенти лавозимига сайловларда Республикачилар партиясидан иштирок этишини маълум қилган миллиардер Дональд Трамп Россия ҳукумати билан АҚШ махсус хизматларининг собиқ ходими Эдвард Сноуденнинг АҚШга қайтарилиши борасида келиша олган бўлишини таъкидламоқда. Бу ҳақда Трамп CNN телеканалига берган интервьюсида айтиб ўтди.

“Менинг фикримча, Сноуден мутлақ хоин ва мен у билан жуда қаттиқ гаплашиб қўйган бўлардим”, деб айтмоқда Трамп ва агар АҚШ президенти бўлганида Россия ҳукумати билан Сноуденнинг АҚШга қайтарилиши борасида келиша олган бўлишини қўшимча қилиб ўтди. “Мен Путин билан келиша олган бўлардим, чунки мен Россия билан ишлар қилганман”, деб таъкидламоқда Трамп. Трампнинг таъкилашича, агар у Оқ уй раҳбари бўлганда Россия “ҳеч қачон Сноуденга ўхшаганларни ўзида ушлаб турмаган ва уларни дарров америка судига топширган бўларди”.

АҚШ маъмурияти ҳанузгача Сноуденнинг махфий ҳужжатларни ошкор қилгани учун судга топшириш учун АҚШга қайтарилишини талаб қилмоқда.

Сноуден АҚШ Миллий хавфсизлик агентлигининг электрон кузатув дастурлари ҳақидаги ҳужжатларни ОАВларга топширган ва 2013 йилнинг июнида АҚШдан Гонконгга қочиб кетган. Сноуден Гонконгдан Москвага йўл олган ҳамда у ердан Эквадорга кетмоқчи бўлган. Бироқ АҚШ ҳукумати унинг паспортини бекор қилгандан кейин Россияда қолган. 2014 йилда Сноуденга уч йил муддатга Россияда яшаш ҳуқуқи берилган.