Эронлик чегарачилар Эроннинг шарқида яхши қуролланган террорчиларни йўқ қилишди. Бу ҳақда Теҳронда бўлиб ўтган матбуот-анжуманида Эрон чегара қўшинлари қўмондони, генерал Қосим Ризоий маълум қилди.

Ризоийнинг айтишича, бартараф этилган банда мамлакатнинг шарқидаги Миржава чегара олди шаҳарчаси ҳудудида чегарани кесиб ўтмоқчи бўлган. Риозийнинг таъкидлашича, банда таркибида “жанговор ҳаракатлар олиб бориш ва терактларни уюштиришда тажрибага эга бўлган турли давлатлардан ёлланма жангарилар” бўлган.
“Биз икки соатли жанг давомида нафақат бандани йўқ қилишга, балки учта бандитни қўлга олишга муваффақ бўлдик, ҳозир улар кўрсатма бераяптилар”, деб айтди Ризоий.

Эронлик чегарачилар, шунингдек, жангариларнинг ўқотар қуроллари, учта артиллерия қуроли ва уларга ўқ-дорилар, портловчи фугас ва ёруғлик-шовқинли гранаталарни қўлга киритишди.

Ризоийнинг айтишича, жангарилар ҳукумат вакилларига қарши терактлар уюштирмоқчи бўлган ҳамда Эронинг Заҳидин, Кармон ва Бам шаҳарларидаги одам гавжум жойларда терактлар уюштирмоқчи бўлганлар.