CBC телеканали ўзининг сайтида BlackBerry компаниясининг бош директори Жон Чен билан ўтказган интервьюсини жойлаштирди. Чен интервьюсида компания смартфонлар бозорини тарк этмаслигини айтиб ўтди.

“Менинг BlackBerry’ни сотиш ниятим йўқ. BlackBerry акционерлари ўз активларининг яхши нархига эга бўлгунларига қадар шундай бўлиб қолади”, деб айтди Чен.

Чен BlackBerry молиявий пасайиш шароитида йирикроқ ва муваффақиятлироқ корпорацияга сотиб юборилиши мумкинлиги ҳақидаги кўплаб тарқалган гапларга жавобан шундай деди. Харидорлар орасида Samsung, Lenovo ва бошқа компаниялар номлари ҳам тилга олинган эди.

2013 йилда BlackBerry шахсий инвесторга сотилишига бир баҳя қолган, бироқ компания ўзининг мустақиллигини сақлаб қолган ва эътиборни дастурий таъминотга қаратиб, ўз бизнесини мустаҳкамлашга киришган. Компания ўз эътиборини дастурий таъминот бозорига қаратганига қарамасдан, смартфонлар ишлаб чиқариш бўйича фаолиятини тугатмоқчи эмас.

Ченнинг айтишича, BlackBerry дунёдаги энг хавфсиз смартфонларни ишлаб чиқаради, бу смартфонлардан кўплаб давлат амалдорлари фойдаланади. Бундан ташқари, BlackBerry бренди смартфонлар бозорининг асосчиларидан бири ҳисобланади, деб таъкидламоқда Канада компаниясининг раҳбари.

2016 йилнинг март ойигача давом этадиган жорий молиявий йилда BlackBerry дастурлар сотиш орқали 500 млн доллар фойда олишга умид қилмоқда. Агар компаниянинг дастур сотишдан 1-чоракда олган фойдаси икки баробарга ошиб, 137 млн долларга етгани ҳисобга оладиган бўлса, у бу мақсадига бемалол эриша олиши мумкин.