Twitter акциялари 14 июль кунларидаги савдолар пайтида компанияга 31 млрд долларлик сотиб олиш таклифи билдирилгани ҳақидаги хабар туфайли 8 фоизга кўтарилиб кетди, деб ёзмоқда The Wall Street Journal нашри. Бироқ кейинроқ бу янгилик сохта эканлиги маълум бўлди.

Ушбу хабар Bloomberg News агентлиги сайти дизайнини тақлид қилувчи сохта веб-саҳифада чоп этилган, айнан шу ҳолат трейдерларни чалғитган.

Сохта хабарда Twitter банклар билан биргаликда номаълум даъвогардан келиб тушган таклифни қараб чиқаётгани айтилган. Бироқ Bloomberg News вакили ўз твиттерида ушбу хабар ёлғонлигини айтган. Бу хабар bloomberg.market сайтида чоп этилган, ваҳоланки Bloomberg агентлигининг расмий веб-саҳифаси bloomberg.com манзили бўйича жойлашган.

Twitter акциялари 14 июлда бозор ёпилишидан олдин 37 долларни ташкил қилган, бу ўтган сессияга нисбатан 3 фоизга кўпроқни ташкил қилган.

Фирибгарларнинг трейдерларни алдай олганлари қисман бозорда Twitter га бир қатор компаниялардан қизиқиш билдирилаётгани ҳақида юрган гаплар билан тушунтирилмоқда. Бу гаплар ўтган ойда компаниянинг ижрочи директори Дик Костоло истеъфога кетгандан кейин пайдо бўлган эди.