Беларусь президенти Александр Лукашенко кетаётган кортеж Орша-Могилев йўлида йўл-транспорт ҳодисасига учраган. Бу ҳақда ижтимоий тармоқ фойдаланувчиларининг гувоҳликлари асосида УНН нашри хабар берган.

Маълум бўлишича, бу воқеа 7 июль куни, Лукашенко Александрия шаҳридан Минскка қайтаётган вақтда рўй берган.

"Президент кортежига қарама-қарши йўналишда ҳаракатланаётган BMW русумли автомобил катта тезликда кортеждаги Mercedes микроавтобусига келиб урилди. BMW бошқарувчиси машинасининг бир неча марта ағанаши натижасида оғир жароҳатлар олган. Ушбу автомобил зарбасига учраган микроавтобус ичидаги президент қўриқчилари жароҳатланишган ва шифохонага ётқизилишган", дейилади хабарда.

Айни вақтда бу ҳодиса бўйича жиноий иш очилган.