NPD Group компанияси АҚШ видеоўйинлар бозори бўйича ойлик статистикани эълон қилди. Июнь якунларига кўра соҳада ўсиш кузатилди.
Айтилишича, ўтган ойда АҚШда консоллар ва қўшимча аксессуарларга 869.4 млн доллар сарфланди. Бу ўтган йил июнига нисбатан 18 фоизга кўпроқдир – ўшанда бозор ҳажми 734.7 млн долларни ташкил қилган эди.

Энг катта ўсиш аксессуарлар сегментида кузатилди – ундаги тушум 210.7 млн долларга етиб, ўтган йилги кўрсаткичга (157.2 млн доллар) нисбатан 34 фоизга кўпроқдир.
Консоллар секторидаги ўсиш 8 фоизга тенг бўлди. Улар бозор ҳажмининг 313.1 млн долларини келтирди (ўтган йилнинг шу ойида – 291.1 млн доллар). Янги авлод стационар консоллари ичида энг харидоргири деб PlayStation 4 топилди. Жорий йилда бу ускуна беш марта сотувлар етакчисига айланиб улгурди. Унинг асосий рақиби Xbox One фақатгина апрель ойи якунларига кўра биринчиликни қўлга киритди.

Ўйинлар компанияларга 345.5 млн доллар келтирди. Бу ўтган йилги 286.5 млн долларлик кўрсаткичдан 21 фоизга кўпроқдир. Июннинг энг машҳур лойиҳалари қуйидагилар бўлди:
1. Batman: Arkham Knight (PS4, XBO, PC);
2. The Elder Scrolls Online: Tamriel Unlimited (XBO, PS4, PC);
3. Lego: Jurassic World (360, XBO, PS4, PS3, 3DS, Wii U, PC);
4. The Witcher 3: Wild Hunt (PS4, XBO, PC);
5. Splatoon (Wii U);
6. Minecraft (360, PS3, XBO, PS4);
7. Grand Theft Auto V (XBO, PS4, 360, PS3, PC);
8. Mortal Kombat X (PS4, XBO);
9. NBA 2K15 (360, PS4, XBO, PS3, PC);
10. Call of Duty: Advanced Warfare (XBO, PS4, 360, PS3, PC).