Россия интернетни ривожлантириш институти 1 октябргача президент Владимир Путинга интернетнинг рус тармоғини ривожлантириш ҳақидаги таклиф билан чиқади.

Таклифлар ичида мансабдорларнинг компьютерларида Windows ўрнига очиқ кодли Linux операцион дастурига ўтиш бор. Бу ҳақда РБК нашри хабар бермоқда.

Институт раҳбари Герман Клименконинг сўзларига қараганда, ташаббус секин-аста, 2017 йилга қадар жорий қилиниши керак.
“Биз бир қанча ҳокимлар билан бу борада келишувга эришдик. Уларнинг компьютерларидаги Windows ўрнига очиқ кодли Linux операцион дастури ўрнатилади”, – деди Клименко.

Институт маълумотларига қараганда, 2013 йили Windows маҳсулотларининг айланмаси 109 млрд рублни ташкил қилган. Давлат Думаси стратегик ахборот тизимларини ривожлантириш қўмитасида эса бошқа маълумотлар айтилган эди – 34 млрд рубль.