Чеченистон Республикаси раҳбари Рамзон Қодиров Россияга жорий йилда Саудия Арабистони қироли Салмон ибн Абдулазиз ал-Сауд келиши мумкинлиги, Чеченистон эса бу мамлакатнинг учта делегациясини кутиб олишини айтди. Бу ҳақда Рамзон Қодировнинг инстаграмдаги саҳифасида маълум қилинди.

Чеченистон раҳбари маълум қилишича, Жиддада унинг иштирокида валиаҳд шаҳзода ўринбосари, Саудия Арабистони мудофаа вазири Муҳаммад ибн Салмон билан учрашув бўлиб ўтган. Ушбу учрашувда шунингдек қирол маъмурияти раҳбари, ташқи ишлар вазири, маданият ва ахборот вазири, қиролликнинг хавфсизлик хизмати раҳбари иштирок этган.

Қодировнинг айтишича, Саудия Арабистони мудофаа вазири Чеченистоннинг террорчилик, экстремизмга қарши кураши ва иқтисодиётининг ривожланиши тажрибаси ноёб эканлигини айтиб, Чеченистонга ташриф буюриш истагини билдирган.