АҚШнинг Фергюсон шаҳрига афроамерикалик Андрю Андерсон полиция бошлиғи сифатида тайинланди. Бу ҳақда Time нашри хабар берди.

Эслатиб ўтамиз, бу шаҳарда ўтган йилнинг августида қора танли ўсмир Майкл Браун оқ танли полициячи Даррен Уилсон томонидан отиб ўлдирилиши туфайли куз ойига келиб тартибсизликлар бўлиб ўтганди. Кўп ўтмай норозилик намойишлари АҚШ жанубидаги бир қанча шаҳарларга ёйилган эди.

Андрю Андерсон биринчи навбатда жамоатчилик ва полиция ўртасидаги муносабатларни яхшилаш бўйича иш олиб боришини маълум қилган.

Маълумот учун, Фергюсон шаҳрида муқаддам полиция бошлиғи сифатида ишлаган Том Жексон шу йилнинг март ойида ишдан бўшатилган, бунга Адлия департаменти томонидан шаҳарда полиция томонидан ирқчилик характеридаги ҳаракатлар олиб борилгани ҳақидага маълумотлар чоп этилгани сабаб бўлганди. Шундан сўнг, бу лавозим учун бутун мамлакат бўйлаб муносиб номзодни қидириш бошланганди.