Strategy Analytics компаниясининг тадқиқотларига кўра, Apple компаниясининг смарт-соатлари Samsung ва бошқа ишлаб чиқарувчиларни четга суриб, қўлга тақиб юрилувчи қурилмалар бозорининг 75,5 фоизини эгаллаб олди. Бу ҳақда 9to5mac портали маълум қилди.

2014 йилнинг 2-чорагида бу бозорда Samsung етакчилик қилиб, бозорнинг 73,6 фоизини эгаллаган эди. Бироқ жорий йилнинг апрелида Apple Watch нинг сотувга чиқарилиши билан Корея компаниясининг улуши фалокатли тарзда камайиб кетди, яъни компаниянинг ҳозирдаги улуши 7,5 фоизни ташкил қилмоқда. Ҳисоботда, шунингдек, 2015 йилнинг 2-чорагида “ақлли” соатларнинг 17 фоизи бошқа ишлаб чиқарувчилар томонидан ишлаб чиқарилгани айтилмоқда.

Жорий йилнинг 2-чорагида Apple 4 млн дона смарт-соат ишлаб чиқарган, қолган 1,3 млн та смарт-соат бошқа компаниялар томонидан ишлаб чиқарилган.