Facebook ижтимоий тармоғидаги ўзбек фойдаланувчилари орасида порнографик мазмундаги вирус тарқалмоқда.

Uz24.uz берган маълумотларга кўра, “Водители Ташкента”, “Потребитель.Уз” ва шу каби бошқа гуруҳларда тармоқдаги кўплаб аккаунтларни бузишга улгурган вирус пайдо бўлди. У фойдаланувчи ҳавола бўйича ўтганда ёки унга “Like” босганда ишга тушади. Натижада вирус фойдаланувчини огоҳлантирмасдан унинг аккаунти номидан тармоқдаги гуруҳларда ушбу мақолани чоп эта бошлайди.

Гуруҳ администраторлари фойдаланувчиларни ушбу вирусли роликни очмасликка чақирмоқда. Бу огоҳлантиришларга қарамай, фойдаланувчилар видео манзили бўйича ўтмоқда ҳамда уни янада оммавий тарзда тарқалишига кўмаклашмоқда. Бир неча администраторларнинг сўзларига қараганда, улар ижтимоий тармоқ модераторларига шикоят билан мурожаат қилган ҳамда улар видеони блоклашни бошлаган.