Таниқли театр ва кино актёри, Ўзбекистон халқ артисти Мурод Ражабов театрдан кетганлиги ҳақида фикр билдирди. Гарчи у сабаблар ҳақида очиқ гапирмаган бўлса-да, айрим ишоралар бериб ўтди.

Маълумки, Муқимий номидаги Ўзбек давлат мусиқали театрига раҳбар этиб тайинланган Ражабов бир муддатдан сўнг у ердан бўшаб кетди. Бу воқеа матбуотда ва халқ орасида турли мишмишлар тарқалишига, жумладан, айрим санъаткорлар янги раҳбар билан келиша олмай, устидан “ёз-ёз” қилгани қизғин муҳокамага олиб келди.

“Муқимийга раҳбар бўлиш таклифи берилганда иккиланмадим. Чунки театр асли қандай даргоҳ, бугун Муқимийга нима етишмаётгани, у ердаги тартиб қандай бўлиши кераклигини яхши билардим. Шунинг учун ҳам у ерда ишлаш мен учун қийин бўлмади”, – дейди санъаткор “Даракчи” газетасига берган интервьюда.

“Театрдаги аксарият актёрларнинг гапларига, мен ҳақимдаги ёзган аризаларига қўл силтадим. Уларга инсофдан, одамгарчиликдан маъруза ўқигандан нима фойда? – сўзида давом этади у. – Ҳаммасини вақтнинг измига ташладим. Одамларнинг назарида мен театрдан актёрлар, жамоамнинг шикояти сабаб кетган бўлиб кўринишим мумкин. Бироқ бунинг асл сабаблари умуман бошқа. Буни халқ билиши шарт эмас, менимча.
Жамоамнинг шикоятларига келсак, уни ўқиб, тўғриси, жаҳлим ҳам чиқмади. Шунчалик куракда турмайдиган гапларни қандай ёзиш мумкин, деб кулдим холос”.