АҚШ президенти Барак Обама Кениядаги ташрифи давомида тадбиркорлик бўйича глобал саммитдаги иштироки пайтида Африкани тез суръатлар билан ривожланаётган ҳудуд сифатида қайд этди. Бу ҳақда ABC.News хабар берган.

"Африка дунёнинг тезкорлик билан ривожланаётган ҳудудларидан бири саналади. Одамлар қашшоқликдан чиқишмоқда", дейди у.

Обама ўз ташрифи давомида биринчи навбатда хавфсизлик масалалари, шунингдек АҚШнинг Африкадаги савдо ва инвестициялари ҳажмини ошириш истиқболларини муҳокама қилишни режалаштирган. АҚШ Конгрессининг 20 нафар аъзоси ва 200 нафардан ортиқ америкалик ишбилармон сармоядорлар унинг бу сафарини маъқуллашган.

Кения президенти Ухуру Кениата Обамани Найробидаги аэропортда кутиб олди ва у билан хавфсизлик масалалари бўйича гаплашди. Уларнинг суҳбатида 2013 йилда Найробида амалга оширилган теракт эсланган ва бу теракт туфайли хорижий сармоядорларнинг қизиқиши пасайиб, мамлакат иқтисодиётига келтирилган зарари ҳақида гаплашилган. Кения президенти Обаманинг ўз юртига ташрифи Кениянинг аҳволи яхшиланишида муҳим ўрин тутишига умид билдирган.

Қайд этиш жоизки, Обаманинг Кенияга ташрифи мамлакат фуқаролари учун узоқ кутилган ҳодиса бўлди. Обаманинг отаси ушбу юртда туғилган ва унинг кўплаб қариндошлари ҳали ҳам шу ерда истиқомат қилишмоқда.