ШҲТ Минтақавий аксилтеррор тузилмаси бошлиғи Чжан Синьфэн Тошкентда Европа Жиноий полицияси ташкилоти (Европол) раҳбарияти билан учрашув ўтказган. РИА Новости нашрининг хабар беришича, учрашувда томонлар террористик гуруҳларга қарши курашда ўзаро ҳамкорлик қилиш масаласини муҳокама қилишган.

"МАТТ раҳбари ўзининг европалик ҳамкасби Вил ван Хемерт билан суҳбат чоғида интернет орқали террорчиликни тарғиб этиш муаммосига қарши курашиш масаласини муҳокама қилишди", дейилади хабарда.

Чжан Синьфэн ташкилот таркибидаги мамлакатларга террористик ташкилотлардан келадиган хавфга қарши амалга оширилаётган ишлар ҳақида таъкидлаб ўтган.

Тузилма маълумотларига кўра, ташкилот коммуникация технологиялари соҳасида терроризмга қарши кураш мақсадида махсус таҳлилчилар гуруҳини ташкил этган.

Маълумот учун, шу йилнинг 1 июль кунида Европол таркибида "ИШИД" ва "Ал-Қоида" ташкилотларининг интернет орқали тарғибот олиб боришига қарши курашувчи махсус бўлиб ташкил этилган. Бу бўлим жангариларнинг ноқонуний сайтлар орқали одамларни ўз сафига ёллаш борасидаги ҳаракатларини аниқлаш билан банд бўлади.