Машҳур қирғизистонлик фазогир, асли ўзбек Солижон Шарипов Тошкентга ташриф буюрди. У билан Cafe Scientifique лойиҳаси доирасида суҳбат уюштирилди.
Учувчи ва муҳандис, фазогир, Россия, Ўзбекистон ва Қирғизистон давлат мукофотлари совриндори, авиация полковниги Солижон Шарипов Тошкентга БМТ Тараққиёт дастури кўмагида сафар уюштирди.

У Anticafe O2да тўпланганларга ўз ҳаёти ва фаолияти ҳақида гапириб берди. Фазогир бўлишга унга буюк орзу ва Ўзган шаҳар кутубхонаси ёрдам берди. Ушбу кутубхонада 60 мингта китоб бор эди. Бўлажак фазогир у ердаги техник адабиётлар билан батафсил танишиб чиқиб, ўзининг келажаги ҳақида муайян хулосага келди.

Шариповнинг айтишича, у уй вазифаларини асосан танаффус пайтида мактабнинг ўзида бажарган. Уйда хўжалик юмушлари кўплигидан бунга улгурмаган. Аниқ фанлар бўйича берилган вазифаларни у жуда осонлик билан ҳал қила олган.

Турли саволларга жавоб бераркан, Солижон Шарипов “Союз”нинг энг ишончи фазо кемаси эканлигини таъкидлаб ўтди. Шу боис фазо туристлари айнан уни танлайди.
Омадли старт берилган тақдирда кема 520 секунд ичида 28 минг км/соат тезликка эришади. Орбитага чиқиб олгач, кема вазнсизлик ҳолатига тушади.
Шарипов сўзларини Феруз Воҳидовнинг сўзлари билан якунлади: “Ҳар бир инсон ўз соҳасининг профессорига айланиши керак”.

Манба: Gazeta.uz