25 июлга ўтар кечаси Туркия Ҳарбий-ҳаво кучларига тегишли самолётлар томонидан Сурия ва Шимолий Ироқдаги жангариларнинг нуқталарига авиазарбалар берилди. Бу ҳақда Туркия бош вазирининг матбуот хизмати маълум қилган.

"Ўтган кечада Туркия Ҳарбий-Ҳаво кучларига тегишли самолётлар ИШИД ва Курдистон ишчилар партиясига қарши ҳарбий амалиётлар ўтказди. Ироқ шимолидаги Зап, Метин, Гара, Авашин-Басьян, Хакурк ва Қандил ҳудудларига берилган зарбалар натижасида жангарилар ўлдирилди ҳамда партияга тегишли ҳарбий объектлар йўқ қилинди", дейилади хабарда.

Маълум қилинишича, Туркия ҳарбийлари қуруқликдан туриб ҳам замбарак ва танклар орқали ИШИД ва Курдистон ишчилар партияси базаларига зарба ёғдирган.

Шуниндек, мамлакат ичкарисида ҳам бу ташкилотларга қарши аксилтеррор тадбирлар ўтказилмоқда. 24 июль куни бошланган амалиёт давомида шу вақтгача 22 вилоят ҳудудида ИШИД ва Курдистон ишчилар партиясига алоқадорлиги гумон қилинган 320 киши ҳибсга олинган.