Эрон Ташқи ишлар вазирлиги раҳбари Муҳаммад Жавод Зариф Форс кўрфазидаги давлатларга Яқин Шарқда ўрнашган жангарилардан келиши мумкин бўлган хавфга қарши биргаликда курашишни таклиф қилди.

"Ҳудуддаги бир давлатга нисбатан таҳдид барча давлатлар учун таҳдид ҳисобланади. Ҳеч қайси давлат бу борадаги муаммони ёлғиз ҳал қила олмайди", деб баёнот берди эронлик вазир.

Қайд этиш жоизки, Яқин Шарқда охирги 1 йил давомида "ИШИД" ташкилоти жангарилари атрофдаги мамлакатлар тинчлигига раҳна солиб келмоқда. Бу ташкилот жангарилари Сурия ва Ироқнинг бир қанча вилоятларини босиб олишган. Бундан ташқари "ИШИД" Ливия ва Шимолий Африканинг катта ҳудудида таъсир кучига эга ҳисобланади.

Таҳлилчиларнинг баҳолашига кўра, "ИШИД" айни вақтда 90 минг кв. км майдонда ўз назоратини ўрнатган ҳамда 50 мингдан 200 мингача жангарини ўз сафида бирлаштирган.